【品牌私心推】SOU·SOU

【品牌私心推】SOU·SOU

經典數字、松樹、五十音歌,呢啲圖案有冇令你覺得好熟悉呢?充滿日本格調,具有四季風情嘅設計,真係非SOU·SOU莫屬喇!

 

SOU·SOU! そうそう !!

SOU·SOU係一個著名嘅京都品牌,以日文「そうそう 」嚟命名,係日本人對話交談之間嘅常用語,有隨聲附和嘅意思。(翻譯:即係「啱啊!啱啊!」咁解)

SOU·SOU 嘅創辦人係若林剛之先生,佢出生於京都,為咗實現自己嘅夢想,成為一個時裝設計師,佢一人遠赴東京嘅一間服裝設計學校讀書,因而學識咗西裝裁縫嘅技巧。若林先生畢業之後,仍然繼續服裝設計之路。然後偶然嘅機會下遇到建築師辻村久信先生,再透過辻村先生嘅介紹,而認識到紋樣設計師脇阪克二先生,從此就展開咗三人合作嘅契機。

SOU·SOU品牌嘅前身係 teems design+moonbalance,係將若林先生嘅公司名同辻村先生嘅公司名組合而成。 佢哋嘅品牌理念係要「傳承和風傳統、重現時尚新風貌」,唔會受到時代嘅限制。若林先生覺得脇阪先生嘅布料就係能夠跨越時代嘅經典作品,所以當時嘅商品都採用咗脇阪先生嘅布料製作,完美地將復古嘅圖案設計融入到各種生活用品。由於佢哋品牌個名實在太長喇,好難令人記住,後尾藉住進入東京開分店嘅機會,改名為SOU·SOU。

已逾百年歷史嘅日本紡織技術

 

SOU·SOU 係三重縣津市嘅傳統工藝品,充滿時尚感,呈現四季風情。除左設計精緻之外,佢哋對品質嘅要求都係非常嚴謹。SOU·SOU 堅持日本製造,唔依賴中國生產,傳承、振興日本國內技術,將傳統產業融入我哋嘅生活,先有良好嘅商品品質。
例如伊勢木棉嘅紡織布料,佢哋嘅織布機已經超過100年歷史,織出嚟嘅布料都有獨特嘅手感,洗嘅時候會越洗越柔軟,手感會越嚟越好,唔容易變皺㗎。

傳統同潮流嘅結合,商品款式包羅萬有

SOU·SOU 嘅招牌商品多到數唔哂,衫褲鞋襪、袋仔、毛巾通通都有,而小編最想介紹嘅係SOU·SOU嘅分趾襪同分趾鞋。
日本嘅分趾襪又稱為「足袋」,分趾鞋叫做「地下足袋」,兩者都係日本傳統文化嘅重要產品,最早源於平安時期,歷史都非常悠久㗎。
而分趾鞋對於SOU·SOU嚟講都有特別嘅意義~
若林先生最初經營SOU·SOU嘅時候都經歷過事業嘅低潮,有一日佢喺倉庫搵到一對分趾鞋,突然靈光一閃,諗到可以將分趾鞋結合潮流嘅圖案設計,令到當時嘅業績瞬間好轉,「地下足袋」可以話係呢個品牌嘅代表作!

若林先生希望:「即使係傳統嘅用品,都可以成為現代人嘅衣著」

以前就連分趾襪都係反映社會階級嘅物品,只有貴族階級先有機會可以著。去到現代社會,日本人著和服、木屐嘅時候仍然會著分趾襪。
唔同款式嘅分趾襪都適用於唔同場合,例如正經嘅場合(e.g茶道)就著白色,有圖案同花紋嘅分趾襪就多數都係俾女性著。

作為香港人嘅我哋都係鍾意低調而不浮誇,雖然我哋好少有機會著住分趾鞋周街走,但SOU·SOU嘅分趾襪絕對適合現今嘅潮流穿著,出街襯衫都冇問題㗎!


▲ SOU·SOU 分趾襪款式眾多,包括經典數字款、五十音歌、梅花、松樹等等。
SOU · SOU Tabi Socks $65
https://www.gtm.hk/shop/sou-sou-tabi-socks/

小編私心推介﹕SO – SU – U


▲ 除咗分趾襪之外,小編最鍾意嘅係SOU·SOU五色數字袋,一個輕便嘅袋最適合我哋平時出街放銀包電話。
米白色嘅袋仔印住簡單嘅阿拉伯數字,呢個圖案叫做「SO-SU-U」,日文漢字係「十數」,色彩繽紛嘅顏色睇落簡單又清爽,啱哂夏天用!
日本 SOU・SOU 五色數字袋 $129
https://www.humbrand.com/products/sou%E3%83%BBsou-isemomen-cotton-stamp-book-5-colors-bag


▲ 同樣係經典數字款嘅環保袋(小編真係好鍾意數字款㗎)
容量大啲可以裝多啲嘢,買餸都可以用添啊!
SOU.SOU Mesh Eco Bag  $109
https://www.gtm.hk/shop/sousou-mesh-eco-bag/

隨住時代嘅變遷,好多文化都慢慢消逝。但SOU·SOU就保存咗日本獨有嘅傳統文化,佢哋嘅圖案設計簡樸而自然,無論係任何年齡層都可以輕鬆Carry到。唔知呢個品牌又有冇吸引到你哋呢?
以上分享咗SOU·SOU嘅小故事,希望我哋都可以好似若林先生咁,好好珍惜自己地方嘅文化啊!

 

Start typing and press Enter to search

購物車

購物車內無任何商品