【開箱】日本沖繩縣產100%香檬汁

【開箱】日本沖繩縣產100%香檬汁

人愈大愈重視身體健康,坊間都流傳咗各種唔同嘅養生之道。聽到「養生」呢兩隻字,可能對於唔少人嚟講都好抗拒,尤其鍾意食甜嘢凍嘢嘅年輕人嚟講,實在難以忍受「養生」嗰種清茶淡飯。不過要養生又唔一定冇啖好食嘅,據聞日本沖繩嘅居民就係靠食一種水果而達到養生效果,長壽又健腦,好多長者嘅年齡都超過90歲㗎!所以今次為大家介紹沖繩特有嘅養生秘寶——香檬。

檸檬、青檸就聽得多,香檬你又聽過未?

香檬(Seequaser) 係日本沖繩出產嘅一種柑橘類水果。根據沖繩方言,”see”係解作「酸」,”quaser”就有「令人想食」嘅意思。每年7月至1月都係香檬嘅盛產季節。喺7月至8月嘅時候,大部分香檬都仲未成熟,外表呈綠色,味道非常酸。喺11月至1月,屬於香檬成熟期,外表會變成橙黃色,酸度都會變得適中。香檬對於沖繩人嚟講係非常普遍,所以佢地嘅日常飲食都會經常使用香檬。

香檬嘅營養價值非常高,維他命C嘅含量係比普通檸檬高好多倍,有助抗氧化,增強身體免疫力。更重要嘅係,香檬含有一種叫「川陳皮素」嘅成份,可以抗氧化、預防癌症同心血管疾病,學者研究都認為呢種成份係令沖繩人健康長壽嘅關鍵原因,有別於一般檸檬。

為求方便大眾,市面上都有販賣一支裝嘅香檬汁,無論係沖調飲品定係烹調煮食都適用。而香檬汁嘅製造方法係將成粒香檬連皮一齊榨取,保留返成粒香檬裡面嘅所有養份。

開箱!一支容量可以沖到幾多杯?


一支香檬汁嘅容量有500ml,小編實測係可以整到大概16杯飲品。飲用方法好簡單,只要將香檬汁加入水或者其他飲品稀釋,就已經可以飲用。包裝上寫嘅比例係1:5~8,每次用一湯匙份量嘅香檬汁已經足夠整一杯飲品㗎喇!


倒出嚟嘅香檬汁係呈鮮黃色。為咗同普通檸檬汁比較個分別,小編試咗直接飲用。普通檸檬汁酸味比較重,而香檬汁味道係微酸而帶回甘。

試飲!為你推薦消暑解渴嘅香檬汁特飲

網上流傳好多唔同嘅飲用方法,今次小編就先飲為敬,揀選咗最common嘅兩種沖調方法,睇下又啱唔啱你哋口味啦!

1. 香檬汁+水/香檬汁+水+蜜糖

調配方法:將1湯匙香檬汁同2茶匙蜜糖倒入杯內,加入約250ml的水,再加入冰塊。(可以按照自己嘅喜好增減水同蜜糖嘅份量)


▲ 最簡單嘅飲用方法就係直接溝水,個人認為味道都係偏酸,同埋比較單調。所以第二次就加埋蜜糖,味道明顯提升咗好多,酸酸甜甜又冰涼,非常適合咁炎熱嘅夏天飲用!

2. 香檬汁+汽水

調配方法:將1湯匙香檬汁同冰塊倒入杯內,加入約200ml嘅汽水。


▲ 雪碧基本上係萬能配搭嚟,出面餐廳好多特飲都係咁樣溝出嚟,所以香檬汁溝雪碧嘅味道都係正正常常,不過甜味就比較重。同埋汽水有氣嘅緣故,所以飲落會覺得更加清爽,瞬間覺得勁解渴!

試食!香檬汁滋味食法

香檬汁嘅用途唔止係飲用,當地居民每日煮食幾乎都會用到香檬,例如可以涼伴蔬菜、烹調肉類(香檬魚、香檬雞),又或者整甜品。以下小編都試咗兩個香檬汁食法,可以俾大家作為參考!

1. 香檬汁蜜糖雞翼

製作方法:先醃製雞翼,將1湯匙香檬汁同適量蜜糖混和,最後將香檬汁同蜜糖塗抹喺雞翼上,放入180°焗爐大約焗10分鐘。(溫馨提示:記得焗嘅中途要反轉隻雞翼啊!)最後嘅成品同普通嘅蜜糖雞翼都好相似,聞落好惹味,睇落又有色澤,加入咗香檬汁會食得出酸酸甜甜嘅味道,所以都比較開胃。如果你本身都鍾意食蜜糖雞翼嘅話,咁呢個香檬汁蜜糖雞翼都應該同樣會令你愛不釋手。

 

2. 刺身配搭香檬汁


香港人食刺身多數都係配豉油同wasabi,但原來沖繩人食刺身係鍾意配香檬汁㗎!香檬汁清爽嘅酸味同海鮮係好夾,就連香檬汁嘅包裝上都有推薦呢種食法。

估唔到原來刺身配香檬汁並唔兀突,反而有種好清新嘅感覺。豉油同wasabi本身嘅味道好重,往往都會喧賓奪主,遮蓋晒刺身原有嘅味道。但香檬汁嘅味道就唔會過於突出,食得出淡淡的微酸之餘,同時都食得出刺身原有嘅鮮味。小編第一次嘗試呢種食法,認為呢個都係香檬汁嘅優勝之處,難怪沖繩居民會有呢種食法啦!

坊間推出咗愈嚟愈多健康補品,都係聲稱可以長壽、健腦,整到成粒藥丸咁又成幾百蚊一樽。雖然一啖吞咗佢又唔會覺得難食嘅,但每日要好似食藥咁,就真係冇動力想keep health了。以上推介呢款日本健康好物,想話俾大家知,其實要養生都有好多方法嘅,一樣可以食得開心又健康。大家不妨考慮一下展開新嘅飲食習慣,唔好再每日一杯珍珠奶茶喇!

▲ 日本沖繩縣產100%香檬汁 $159
https://www.gtm.hk/shop/jphmj/

Start typing and press Enter to search

購物車

購物車內無任何商品