【實測】Tide To Go除污筆

【實測】Tide To Go除污筆

唔知你信唔信呢個世界係有個定律,
唔知點解總係喺着新衫/淺色衫食嘢個陣,都唔知點解一定會整污糟。
望住撻污漬,嗰種無奈同唏噓……

根據墨菲定律所講:凡係有可能出錯嘅事就一定會出錯。
你以為你食嘢小心啲 就唔會整污糟件衫?
與其晒心機每次都小心翼翼,不如嚟個兩手準備!


▲呢件係公司同事怕俾辣湯彈到而整嘅防彈戰衣!雖然佢嘅保護效果顯著,但出街嘅話無理由着到咁㗎嘛……

安心食盡重口味 即時除污有法寶

今次為各位漏口怪實測超有用 即時去污漬嘅 Tide To Go除污筆


▲細細枝筆狀,只有約13cm,夠晒方便攜帶之餘,亦好容易就可以擠出清潔液。

有時出街整污糟咗件衫,但翻屋企隔咗一段時間都已經唔係好清潔到 ´•̥̥̥ω•̥̥̥` )
呢枝筆可以幫你快速去污,仲免水洗,咁就可以去除咗污漬先 以免留印太深~
而 Tide To Go嘅容量為 10ml,都用到10-20次左右㗎。(都要視乎污漬大細)

實測開始~

今次實測會使用豉油、茄汁、咖啡,目標係睇吓 Tide To Go 除污筆 對邊種污漬嘅除污能力高啲!


▲ 測試方法:將污漬添喺棉質白色衫上,用紙巾印乾後,再用除污筆喺污漬上打圈,測試除污能力


▲ROUND 1,「哎呀 點壽司時唔小心倒瀉咗豉油!」
打頭陣嘅豉油污漬未開始清除時,好似為我件純潔嘅白tee加咗大粒墨咁,好想快啲趕佢走啊!


▲一開始清豉油漬嘅時候,越捽佢就越大撻,真係嚇親我哋 ∑(ι´Дン)ノ差啲以為實測出嚟要倒自己米㗎喇……
但好彩之後有明顯嘅變淡,可能係因為重手得泄 撻漬都比較大撻,所以清潔嘅時間要長少少。


▲ROUND 2,「想sweet下餵BB食薯條 點知闖禍滴咗茄汁落件衫(°ཀ°) 水洗都唔清啦啦啦啦」
茄汁污漬用紙巾抹完都係一大撻色,行返出街個個都知我上餐食咩。


▲使用除污筆打圈時 茄汁漬比起豉油漬易清啲,可惜到最後留嘅污漬反而係最深。


▲ROUND 3,「朝早整杯咖啡醒個晨……弊!放落枱面大力得泄 彈到件衫一點點,轉頭點見客喎」
咖啡污漬未開始清除時,其實都唔算非常深色~


▲咖啡漬嘅範圍好大好分散,但好彩污漬大小相對細啲,所以好快就見到除污嘅成效~

白棉tee失去一切 除污筆證實了這一消息

三款污漬令呢件白色衫飽受折磨,到底最後 Tide To Go除污筆 有幾大嘅幫助呢?


▲ 先睇第一次清潔之後嘅效果,茄汁漬(圖中)會比較明顯,豉油漬(圖右)已經無咁深色,而咖啡漬(圖左)嘅效果係最好,好快已經去到污漬,但亦有可能關污漬嘅大細事。


▲再清多次之後,三個污漬都已經淡色咗好多,茄汁漬都算係勉強見得人。


▲等除污筆嘅清潔劑都乾咗之後,咖啡漬同豉油漬已經幾乎冇咗蹤影,茄汁漬就相對淡色咗啲。

去除不同污漬嘅分數(5星為最有效):
豉油漬★★★★
茄汁漬★★
咖啡漬★★★★★

美中不足 但應急有餘!

嚟個小總結啦,Tide To Go除污筆 雖然未做到啲洗衣粉廣告嗰啲「嘩」一聲就變白淨,但主要係可以達致即時嘅除污效果,以解燃眉之急。不含漂白劑 用喺其他色衫上都唔怕之後會漂白到一撻撻!
同埋同事們覺得 有污漬之後記得要盡快用除污筆清理,效果會更好㗎~

Tide To Go 除污筆 | $30
https://www.humbrand.com/products/tide-to-go

Start typing and press Enter to search

購物車

購物車內無任何商品