香港話晒都有美食天堂之稱，雲集咗唔同地方嘅好西，但講到本港名物 就一定會有打邊爐份！
佢個精髓並唔係湯底可以幾有特色，唔係嘢食種類可以幾多花款，
追求嘅可能只係成班老友一齊烚下烚下 隊翻枝大啤嘅快感 (ゝ∀･)b
每次同Friend打邊爐都槍林彈雨如臨大敵咁款，肥牛永遠爭崩頭！
（無用資訊：小編覺得牛肩脊打邊爐真係無得輸）
但你又有無諗過可以將呢個戰爭延續到飯後呢？
不得不講，香港人對美食嘅熱愛真係痴線級！
由元老級嘅香港燒賣關注組等群組出現之後，越嚟越多同類型嘅關注組出現，
而家竟然仲有人鍾意打邊爐到設計咗個Board Game出嚟！
聽落一定打晒問號，打邊爐到底可以點玩？（嘢食當然唔可以亂玩～）
而家就同大家介紹吓呢副卡牌遊戲到底係玩啲咩㗎啦！
材料準備
副牌同真正嘅打邊爐一樣，配料真係好多好豐富，主要分為四個種類~
▲ 由左至右分別係：角色牌、湯底牌、食材牌／機會牌、功能牌
▲ 角色牌（卡背紅色）：
8個角色都各自會有指定必須收集嘅主要食材，角色牌唔使俾其他人睇㗎，保持神秘感遊戲更加好玩
▲ 湯底牌（卡背啡色）：
每款湯底會指定唔同嘅食材組合（主要食材＋自選食材）所需數量，遊戲開始時需要抽取一張
▲ 食材牌（卡背綠色）：
會與機會牌洗混
食材分為4款：肉類、蔬菜、丸類、海鮮
亦會有分單拼食材（大部份）同雙拼食材（極稀有）
▲ 機會牌（卡背綠色）：
會與食材牌洗混
如果抽到就要根據其功能進行行動!
▲ 功能牌（卡背藍色）：
即係手牌，分為3種：
基本（白色）：單拼食材需要先用「醬」之後先可以再「食」／雙拼食材只需用「食」，要「食」咗先會成功計分
攻擊（黃底粉字）：「夾」可以拎其中一個對手一組食材（即包括食材上嘅「醬」「食」功能牌／「舐」可以拎走其中一個對手一組食材最上嘅「基本功能牌」／「飲LA」可暫停指定對手一局（收到3張飲啦牌要嘔晒自己啲食材出嚟）／「慳D」將指定對手食材區其中一張「基本功能牌」無效
防禦（粉底黃字）：「X你老母」可抵擋「夾」「舐」／「收皮」可抵擋「飲LA」／「烚ON」可取消無效化功能
搞好晒啲材料架生，準備開爐食嘢喇
首先就梗係要擺好咗個陣先！
先將兩疊卡牌分別洗勻（綠色：食材牌同機會牌需一齊洗勻／藍色：功能牌則獨自洗勻）
抽出12張綠色卡牌平放為食材區（4張X3行）
藍色功能卡牌為手牌，平均派發每人5張（每個回合結束嘅時候 手牌唔可以多過7隻）
每人都抽取紅色角色牌，決定指定需進食食材種類٩(｡・ω・｡)و
抽取1張啡色湯底牌決定食材數量分配
▲ 例如：抽到清湯＋淫娃角色，就必須進食5張（數量）海鮮（指定種類）＋1張（數量）除海鮮類嘅食材（非指定種類），最先食齊所需嘢食就係大贏家(๑•̀ㅁ•́๑)✧
遊戲正式開始！
每人嘅進行回合可以進行最多4步行動
第1步行動（必須進行）：隨機於食材區揭開1張牌
▲ 如果揭中機會牌，需跟據指示進行，將該卡放於棄置區，抽牌補至食材區，然後直接結束回合，輪到下位玩家進行
▲ 如果揭中食材牌，就可以選擇進行第2－4步行動（不必順序進行）～
選擇1（可重複進行）：打出「醬」或「食」牌，收取／進食食材，出1張牌計1個行動，收取食材後要抽返牌補至食材區空缺嘅位置（單拼食材必須先出「醬」再出「食」先叫成功進食）
選擇2（可重複進行）：繼續喺食材區翻牌，揭1張牌計1個行動
＊如揭中機會牌需跟據指示進行，然後直接結束回合＊
選擇3：打出攻擊牌，直接完結回合（每回只可打出一次攻擊牌）
選擇4：棄置最多3張手牌以抽取同等數量功能牌，直接回合結束
選擇5：咩都唔做，直接抽功能牌結束回合
進行選擇1－3嘅話，回合結束時都要抽功能牌
如揭牌時揭中機會牌，則不能再抽取功能牌，要直接結束回合(｡ŏ﹏ŏ)
玩家可以喺呢3個行動中，隨意選擇行動，所以仔細地思考決定行動次序都係致勝關鍵嚟嘅呢！
＊例：打出醬牌收取食材>打出食牌進食所收取食材>攻擊其他玩家>抽功能牌>回合結束＊
（選擇4只可獨立進行，不可醬／食／揭牌後才進行換牌）
你追 我躲 攻守交防戰
功能牌中除咗「醬」／「食」牌之外仲有好多攻擊／防守牌，但詳細功能就唔多講喇
等大家睇吓說明書同感受吓點部署去攻擊啦！
因為成個game嘅精髓就係點樣激到啲Friend紮紮跳⎝(◕u◕)⎠
是敵是友 玩完仲有無Friend做 就睇今鋪喇！
食後感
成副卡牌好豐富，運用晒打邊爐所需嘅元素去設計出一副有本土特色嘅卡牌遊戲
一收到大打邊爐嘅時候，包裝的確好有驚喜，
配色夠晒玩味，插圖又盞鬼
仲用咗香港人常用meme圖嘅主角化身成遊戲角色！
最抵死係配合埋港味十足嘅常用語，
所有嘢都好貼地玩起上嚟更有代入感 ─=≡Σ((( つ•̀ω•́)つ
新手上路會覺得有啲複雜，因為功能牌同機會牌都比較多，令到記規則嘅過程變得麻煩
而且步驟可能都比較多，所以玩頭幾次都可能要拎住說明書咁玩( ˘･з･)
但逐漸熟練咗啲規矩後 樂趣就大咗好多，就好似真係打邊爐爭食咁
同呢個遊戲雖然兩個人都進行到，但趣味性一定大大減低
就真係打邊爐咁，要人多熱鬧啲先夠fun！
而家疫情緩和咗，社交活動應該可以逐漸回復正常啦
係時候約埋親朋好友「大打邊爐」！ ⎝( OωO)⎠⎝( OωO)⎠⎝( OωO)⎠
【Humbrand 現貨】【香港首創卡牌遊戲】大打邊爐｜$369
https://www.humbrand.com/products/【本港首創】daaidaabinlo-card-game
大打邊爐官方遊戲教學影片
https://www.daaidaabinlo.com/pages/%E9%81%8A%E6%88%B2%E6%95%99%E5%AD%B8
遊戲詳情
美術設計:Rex Koo
遊戲配件:功能牌138張，食材牌46張，機會牌24張，角色牌8張，湯底牌4張，指示卡2張， 說明書1份
主要成份:紙張
卡牌尺寸:88mm x 58mm
