GETHEMALL 除咗落力為大家搜羅各式好物去代購，對於社會服務同責任都同樣重視！
近年關於傷健共融嘅議題越來越受到關注，GETHEMALL當然都坐言起行٩(｡・ω・｡)و 我哋非常榮幸地喺九月同一間視障學校合作，舉辨咗今次企業參觀活動，活動會係由同事向視障學校同學們進行唔同倉務工作項目嘅介紹，以及親手體驗其中嘅工作，增進對倉務運作嘅了解，推動共融。一齊嚟睇下今次活動同花絮～
認識企業 各展所長
同學們嚟到我哋倉庫之後先參觀咗整體日常程序，由門口介紹到內部，包括收貨、點貨分類、包裝、填寫出貨資訊等，同學遇到有疑惑嘅地方都好積極咁提出疑問，熱衷了解我哋嘅倉務運作～
倉庫入面有一部同學們非常好奇嘅機器，呢個L字型機器到底係？！
其實就係緩衝氣泡布製造機，可以現場為膠卷內充氣成一格格緩衝Bubble 保護貨物，咁平時未使用嘅時候就唔會佔用到太多倉庫空間(✪ω✪) 同學都好專心咁聽同事嘅講解！
緩衝Bubble仲有基本嘅泡泡紙款，但一般平時接觸嘅都係一細張嘅，所以同學都好好奇 積極上手摸下大卷裝嘅泡泡紙～
講到同學們最興奮嘅環節，一定要提唧車體驗٩(｡・ω・｡)و 平時倉務同事就係利用唧車去移動又重又大批嘅貨品，
邀請咗幾位同學喺同事嘅指引下，慢慢嘗試一下一下唧起成板貨同移動，對同學嚟講相當新穎！
最尾準備咗一個模擬包貨嘅環節，同學們可以體驗到要先將易碎物品包裝，再將同張訂單其他貨品安排埋一齊唔好散開。
每位同學都可以落手參與，一張訂單由收齊貨品後，到準備包裝同入袋，再安排寄出。看似簡單嘅步驟，同學其實都有遇到唔同操作上嘅問題，但解決呢啲問題後同學們最終都有順利包好晒٩(๑•̀ω•́๑)۶
只要同學們保持今次解難時所擁有嘅積極態度，相信喺面對其他生活中或學業中嘅難題同樣都可以迎刃而解！
好榮幸今次合作令同學們參觀甚至體驗咗一部分倉務運作，了解社會中唔同企業嘅運作，更加係令我哋更加深入了解視障學生嘅需求同挑戰！希望透過呢類型合作，能夠促進社會共融，令每個人都能夠平等地參與同享受生活中嘅各種機會及活動。
祝願同學們可以克服視障，各展所長( • ̀ω•́ )
