「Elevator Elevator 心越急越煩問題越難拆 Come on」
人生最嘥時間就係等待，日日等唔同嘅嘢，等車等買演唱會飛等搭𨋢
你又邊估到等𨋢都可以成為一個遊戲。
搭𨋢打尖遊戲－電梯前！
電梯前 (In Front of the Elevators) 係來自日本嘅大熱桌遊～
最近終於推出咗中文版！
先開為敬 開佢部𨋢
《電梯前》遊戲背景好簡單，就係一家人去百貨公司，但係好多人等𨋢，為咗要上樓shopping，必須要打尖入𨋢(｡ŏ_ŏ)
遊戲目的就係將你嘅家族成員帶上去隊頭，送晒佢哋入𨋢！
▲ 外盒細小，但入面裝住無窮樂趣 d(d＇∀＇)
開盒後首先會見到嘅係一疊計分紙，因為每次遊戲需要進行三個回合，每回合記錄嘅話方便最後計分，
所以第一鋪輸個馬鼻都唔緊要，絕對可以後來居上㗎！
▲ 中文版《電梯前》好貼心咁提供咗4種語言嘅說明書：中文、英文、日文、法文
玩遊戲之前，我哋一齊睇下有咩卡牌先。
遊戲可以2－4人進行，但卡牌就有5隻顏色，總共49張。
▲ 家族牌5張（每隻顏色各1）：2人遊戲每人2張，3／4人遊戲每人1張
家族牌係你所代表嘅顏色，卡上亦印咗打尖規矩俾大家玩嘅時候參考返
打尖規矩：特定角色可以打另一指定角色尖
例如你有男孩角色，而該𨋢排最後嘅係女孩，咁男孩就可以打尖 排喺女孩前面喇~
▲ 人物牌35張：有5個顏色，每款顏色都有7個人物
2／4人局：用5種顏色進行遊戲
3人局：用4種顏色進行遊戲
▲ 角色：女孩、男孩、媽媽、爸爸、奶奶、爺爺、迷路小女孩
▲ 每張角色牌嘅上方框框都會講邊個人物可以打邊個嘅尖
例如女孩可以打男孩尖，男孩可以打媽媽尖，感覺有少少似玩鬥獸棋 咁有既定嘅食物鏈(ｏﾟﾛﾟ)┌┛Σ(ﾉ´*ω*`)ﾉ
迷路小女孩？定係古惑小女孩？
每個顏色都都會有迷路小女孩，佢其實有個特別嘅功能！
如果使用咗迷路小女孩，同一條隊入面同小女孩同顏色嘅角色都要排喺佢後面 Σ(°Д°;
▲ 例如：假如你係藍色玩家又抽到綠色小女孩，使用喺第一條隊後綠色爸爸就要排小女孩後面
咁藍色媽媽就可以乘機上位 成功入到𨋢喇！
＊注意：迷路小女孩唔係你嘅家庭成員，就算入到𨋢，都只會計0分＊
▲ 電梯牌9張（雙面都可使用）：藍色面2人／4人遊戲時用，暗紫紅色3人遊戲時用
每張電梯牌都會有唔同數字，如果該牌有3種數字就代表係條隊入面排頭3嘅卡牌有分，
而每個數字代表排第幾嘅玩家可以獲得幾多分，所以要留意並唔一定排得越前就越好㗎！
▲ 就好似呢張圖咁，第1部𨋢啡色男孩有2分，黃色女孩有3分
而每張電梯牌上方就有指定獲得雙倍分數嘅角色，如果入第1部𨋢嘅係媽媽／奶奶，就可以獲得雙倍分數~
3個女人1個墟！？唔只女人㗎！
如果同1部𨋢有3個相同角色，就要約去飲咖啡喇！
用咗飲咖啡技能可以額外先賺1分，順便仲可以攬炒其他玩家ψ(｀∇´)ψ
▲ 例如紅色玩家見到同一部𨋢已經有2個爺爺，再使用爺爺（唔一定要用自己顏色嘅爺爺）
就可以垃埋前面2位爺爺去飲咖啡，咁佢就可以先獲得1分喇~
擺好個陣！準備搭𨋢！
（小編sss嘅扮工遊戲時間開始；P）
開局setting：放3張1個𨋢出嚟，因為3人局，所以會用暗紅色呢面
而第1局就用3張1號𨋢，第2局就用2號𨋢，如此類推（睇中間羅馬數字）
向每位玩家派發2張自己顏色嘅卡牌做手牌
然後將剩低嘅牌洗混，再抽出3隻放喺每部𨋢嘅頭位（唔一定要唔同顏色，是但抽3隻就得）
抽牌後再剩低嘅牌大約平均分成3份，放喺𨋢前俾大家出牌後抽返！
遊戲就可以正式開始～
遊戲開始！簡單嚟講！入到𨋢就有分！
開局抽牌時入到𨋢嘅人可以率先開始，然後順時針到下位玩家，
記得每次都係先出1張牌，之後再抽返1張牌
▲ 啡色小女孩出現！
但因為嗰部𨋢無其他啡色牌，所以發揮唔到佢拉人去後面嘅作用
而且就算佢排第3，啡色玩家都唔會拎到4分㗎，因為小女孩計0分！
所以唯有打尖先可以迫小女孩出𨋢 (|||ﾟдﾟ)
▲ 而今次有人出咗黃色小女孩，就可以拉黃色媽媽去最後喇！
▲ 3個奶奶同時出現喺同一部𨋢！
▲ 出去飲咖啡啦！出最後1個奶奶嘅人可以拎走3張，然後獲得1分！
玩後感
本身以為係啲普通合家歡遊戲，原來要勝出遊戲除咗運氣，都需要消耗智力(✘﹏✘ა)
要就住抽到咩顏色嘅牌，諗之後用咩色嘅牌、出咩角色，
可以選擇去自己主動拎分、又或者係拉人哋啲牌去後面陷害人，唔玩到最後都唔知邊個會贏！
而且又唔會話玩得好大壓力，好似玩狼人殺之類咁爾虞我詐
無論2－4個人玩都好玩（感覺4人變數多啲好玩啲），係一個輕鬆又要小心機嘅有趣遊戲٩(๑•̀ω•́๑)۶
日本桌遊《電梯前》－中文版｜$199
https://www.humbrand.com/products/in-front-of-the-elevators
