就嚟步入春夏，好想捉緊乾爽天氣嘅尾巴 同朋友去野餐！但出到去唔知玩咩好(›´ω`‹ ) 咁就可以留意下呢款細細盒嘅Board Game 《恐龍電車》喇！
由山田空太設計，前作《鯨魚電車》已經大受歡迎，續作《恐龍電車》更加喺日本大賣，依家出埋中文版喇！
一款要排列電車同恐龍嘅卡牌遊戲。遊戲目的係玩家要將9張手牌拼湊成不同嘅組合，遊戲以簡單麻雀規則包裝，有恐龍又有電車，顏色鮮艷又有精美配圖，益智同時好過癮，同朋友一齊動下腦筋！
簡單嚟講就係恐龍同電車嚕( ´▽`)
麻雀雖小 五臟俱全，一打開就會見到遊戲配件包括：
中文說明書（書面語） × 1
中文說明書（粵語） × 1
恐龍圖鑑 × 1
卡牌 × 70
計分表 × 1（3張組成）
恐龍仔粒粒 × 4
超級欣賞佢分別出咗口語同書面語嘅兩款說明書，口語嗰款仲要翻譯得相當地道，連同啲麻雀用語 即刻易明好多，香港人睇返都會覺得好有親切感！
其中恐龍圖鑑會係中文版先有，介紹返卡牌上嘅恐龍品種同特色，長知識又有game玩，鍾意恐龍嘅朋友仔或者小朋友更加唔可以錯過～
仲有 4 粒恐龍仔係用嚟計分嘅，中文版仲特登整成咗四款唔同嘅恐龍，超打耳( ♥д♥)
▲ 私心用嚟做影相道具都得，超級得意！
等等等等 即係要點樣玩先
先嚟介紹下玩法，首先要洗勻卡牌，每位玩家開局先抽8張手牌。
到自己回合嘅時候有兩個選擇：
（1）可以抽一張牌庫嘅牌，如果未「食糊」嘅話就要棄返一張冇用嘅手牌。（暗地裏儲到有效嘅牌組可以唔使公開出嚟）
（2）可以用其他玩家嘅棄牌堆中最頂嗰一隻，同自己嘅手牌組合成一個有效嘅牌組，組合之後要公開放喺枱。（類似麻雀嘅「上」，但可以揀嘅對象唔止上家）
玩家最後喺回合中以9張手牌拼到完整嘅數個組合就為之「食糊」，就可以計分₍₍◝(･’ω’･)◟⁾⁾
但點樣叫做有效嘅牌組呢？(*´･д･)
肉食恐龍由 2 張卡牌組成，而草食恐龍則由3張卡牌組成。電車、蒸汽火車、新幹線則可以由3張或更多嘅車卡組成。
拼湊組合嘅時候 都要留意「恐龍蛋」，因為計算分數嘅方法係「分數＝恐龍蛋/2」
「食糊」首先會有兩蛋，之後會因為唔同種類嘅配搭而加更多蛋，令分數更高～
百聞不如一玩
試下開始玩一鋪～
今次手牌抽到大部分都係車，咁小編就嘗試下儲電車同新幹線兩個組合，電車至少仲差一個車身，新幹線就仲差一個車頭。
另外仲要留意最後食糊要係合共9張手牌！
而家其他玩家嘅棄牌堆中最頂嗰一隻分別會有 一個電車車身 同 一個新幹線車身 (☆∇☆)
小編就揀咗棄牌堆嘅電車車身，同自己嘅手牌組合成一個三卡嘅電車牌組，組合之後公開放喺枱。另外棄返一張冇用嘅蒸汽火車手牌～
為咗最尾可以加多一蛋，小編決定全心全意儲「全電車」，咁而家就仲差一個新幹線車頭同一個車身，就可以食糊！
▲ 順利食糊嘅話，首先會有食糊基礎 2 隻蛋，「全電車」可以再加 1 隻蛋，卡上面會有 1 隻蛋，所以總共係 4 隻蛋，分數會係恐龍蛋數目除二，今次食糊就會有2分～
得分就可以喺計分表向前行，紅色暴龍小編就可以行兩分(ゝ∀･)⌒☆ 綠色三角龍因為出銃就要落一格懲罰點隕石，之後得分都要喺隕石嗰行向前行～
再嚟下一回合，雖然小編手頭上儲緊「三對唔同顏色肉肉肉」，但出面被用咗嘅牌入面已經包含晒我等緊嘅紅色肉食恐龍尾巴（三張），即係呢條尾已經「絕章」！
所以我唯有轉儲第二隻色肉食恐龍，或者等奇跡嘅第二張單隻恐龍_(´ཀ`」 ∠)_
最終係成功食到呢個組合嘅話，首先會有食糊基礎 2 隻蛋，擁有三對肉食恐龍「肉肉肉」可以再加 2 隻蛋，三對肉食恐龍唔同顏色會再加 1 蛋，另外卡上面會有 1 隻蛋，所以總共係 6 隻蛋，分數會係恐龍蛋數目除二，今次食糊就會有3分٩(๑•̀ω•́๑)۶大躍進！
最後任何玩家累積夠五分，或者玩家累積咗三次懲罰分即係多過第二次隕石嗰行，就會結束遊戲 最高分嘅贏ヽ(●´∀`●)ﾉ
如果大家都玩熟咗之後可以將遊戲改成六分或七分先完！
玩後感
插圖好得意，如果你識打麻雀就好快上手，如果你唔識打麻雀仲可以順便學埋麻雀點玩(ゝ∀･)b
雖然比起麻雀 佢嘅變化冇咁多，但因為最終嘅組合一定要喺九隻，組合時考慮一樣唔少㗎，如果唔留多啲退路畀自己可能好容易就「絕章」(శωశ) 就算自己冇機會食都同樣地要記得小心出銃呀！
尺寸唔大，拎出街玩或者帶去朋友屋企都好方便，整體嚟講係一個唔使太爾虞我詐、可以輕鬆同朋友玩嘅遊戲～
《恐龍電車 Dinosaur Train Board Game》－中文版｜$129
https://www.humbrand.com/products/dinosaur-train-traditional-chinese-ver
遊戲人數: 2-4人
遊戲時間: 20分鐘
適合年齡: 8歲以上
