品牌推薦, 益您情報, 立雜奇趣

【開箱】My Little Box 2023年 2月號

有錢就身痕 第六期!
繼續同大家介紹日本美妝盲盒 My Little Box~

第一次見My Little Box 咩嚟㗎

日本美妝盲盒 My Little Box 會係按月訂購同出貨的,每月訂閱價格¥3350。每個月會設定唔同主題,嚴選當季流行美妝同時尚配件、雜貨等,並以精美插畫包裹再寄畀訂購者嘅驚喜禮物盒。
佢哋已經有八年歷史,而且合作品牌都有一定嘅知名度,唔怕入面係普遍清貨福袋概念嘅雜牌產品 怕用壞人,亦大大減低咗買咗返去後唔實用 得個擺字嘅機會!
小編自上年九月開始訂閱幾期,嚟緊幾個月都會為大家開箱,揭開廬山真面目(╯✧∇✧)╯

上期1月號回顧
https://www.gtm.hk/all/my-little-box-2023-jan/

2月號 Pink Energy

My Little Box 2月號以 Pink Energy 為主題。滿滿嘅潮流粉紅力量,就算係喺平淡嘅日常生活中,就算係有不順心嘅時候,亦都可以令你鼓舞。心儀之人遇上唔一樣嘅你,或者會更加鍾意?

雖然呢種接近桃紅嘅粉紅色冇特別令小編有好感(´⊙ω⊙`)今期帶畀我哋嘅主要係化妝品同美容小雜貨,包裝係歐美感覺嘅插畫,打開後就係今期內容~

2月主題小冊子同樣列出咗產品詳情,其中仲詳細列出咗今期嘅彩妝單品可以點去配搭~

睇返單品嘅部份,今期會有四款Maybelline 彩妝產品,好似比較少會見到一盒My Little Box 中有咁多款都係化妝品\(●o○;)ノ年資深厚嘅美國化妝品牌Maybelline 價錢親民,加上周圍都有佢嘅開架 對香港女仔嚟講絕對唔陌生,雖然有時評價參差,但有時亦被評為性價比首選!

今次開到嘅先嚟有眼線筆同眉筆。不過兩款我自己手頭上暫時唔需要住,諗住之後送畀朋友 就唔拆開試用了(;´゚ω゚`人)
眼線筆會係超銳目精緻眼線筆(升級版)(BR-4 蜜桃啡),有0.01mm超極幼筆尖同升級咗筆尖穩定性,配方號稱防水防暈染,容易清除不留痕跡,香港官方售價$89。
眉筆係柔霧造型眉筆(升級版)(限定色BR-9 橄欖啡),三角水滴狀筆尖設計,輕鬆描繪出眉毛輪廓。目測同坊間嘅眉筆差唔多設計,咁應該都相當適合新手。香港官方售價都係$89。

另外兩件會係眼影同唇膏,基本上化妝中需要鮮艷顏色嘅部分都提供咗畀你~
迷你眼影盤City Mini Palette(PK-1 Downtown Sunrise ),有齊打底色 深邃色 同提亮色,香港冇賣緊呢款,某國零售價會係¥149。

雖然顏色都算齊,但每一款都係有細閃,對於鍾意上晒啞色先再另外上閃閃highlight嘅人 例如小編 嚟講就未必咁實用了(›´ω`‹ )


▲ 不過佢附埋唔同配搭嘅配色用法,下次都可以試下~

唇膏會係Color Sensational Lipstick N 系列極綻色絲絨霧光唇膏(色號 504 Touch of Nude 焦糖裸粉),號稱著色度高,仲加入咗乳木果油保濕,啞色唇膏都可以順滑塗抹,日本售價¥1320。
一拆出嚟係磨砂質地嘅殼讚!


Nude色唇膏以往畀小編嘅印象麻麻地,皆因以前試過nude色好似搽咗層白色膜喺唇度咁(°ཀ°) 但呢隻半隻nude色搽上唇會覺得都幾自然,雖然都係比起試喺手上面時淺色~
另外飲咗兩次飲管就差唔多甩晒色了(◓Д◒)

除咗Maybelline 彩妝之外,今次仲有一支 john masters naturals 嘅葡萄柚橙花淨化潔面乳。
有機美妝品牌john masters naturals 堅持使用有機原料,連原料嘅生長及收穫過程,均需對環境無害並利於可持續發展。香港都有佢嘅專門店,見網上比較多人試過同好評嘅會有佢嘅洗髮產品。
今期嘅潔面乳會係混合咗唔同嘅植物保濕油,如葵花籽油、刺槐仁油(摩洛哥堅果油)同猴麵包樹籽油,具高效保濕力。喺潔面過程中有三種型態,由凝膠狀化為油狀,再化為乳狀的質地,減少對臉部肌膚嘅摩擦,洗面後仍然滋潤,溫和滋潤地做好徹底清潔。用後容光煥發,使肌膚透明清亮。30g 香港官方售價$160。
用法上有標榜可以用嚟卸妝,個人用落覺得卸眼唇時唔係卸得咁乾淨,但確實洗完後唔會緊繃~

嚟到My Little Box 自家出品,每次盲盒都會加入1 – 3件自家出品,多數以雜貨飾品為主。
今次嘅出品雖然只有一樣,但一嚟佔咗半盒體積,畀佢大一大到 Σ( ° △ °) 打開第一下成頭問號,睇埋介紹就知道原來佢叫「アイスグローブ 」Facial Ice Globes,中文叫做美容按摩冰球,聲稱可以利用冰鎮按摩去除眼袋黑眼圈同面部浮腫,唔睇唔知原來冰球棒喺歐美界紅極一時,連Sephora 同Lookfantastic 都有推出同上架㗎~



▲ 有印上My Little Box 自家logo,入面嘅液體都係粉紅色,貫徹粉紅力量!

用之前需先放喺雪櫃雪15分鐘,由內至外咁去輕輕按摩面部同頸部,今期小冊子仲有介紹埋手法,以下四個動作每個重複三次就完成~


今期產品比較多係化妝品,雖然牌子類型少啲但都有唔同種類嘅彩妝,可以試下唔同風格,都係盲盒嘅一種驚喜 (´▽`ʃ♡ƪ)”~
下期3月會係世界睡眠日嘅月份,見到佢預告會係有關睡眠嘅主題,唔知又會有點樣嘅浪漫呢!今個月你都辛苦了 下個月見~

My Little Box 日本官網
https://www.mylittlebox.jp/

My Little Box 2023年2月號盲盒內容-官方發佈版
https://www.mylittlebox.jp/box/pink-energy

日本其他網站 | 人手報價
https://www.gtm.hk/shop/mxj/