生活百貨, 益您情報

【開箱】台灣Lasty環保食物包第二代

香港人喺疫情後更加離唔開外賣,但外賣亦離唔開使用一次性飯盒同膠袋,

HOW DARE YOU!

近年環保議題越嚟越被關注,想加入無痕飲食,為環境盡一份力(๑•̀ㅂ•́)و✧
但市面上嘅環保餐盒好似都唔係咁啱外賣,成日搞到店家手忙腳亂咁,
有冇一個「自己鍾意用、店家方便用」嘅環保入門款餐盒呢?

為大家介紹返Lasty環保食物包第二代

開箱搶先睇


▲ 今次開箱揀咗經典灰,一打開見到佢係磨砂質地,處於一個扎肉卷嘅嘅狀態,而所有配件都已經喺晒呢個小小嘅盒砌好晒


▲ 拎出嚟嘅樣子係一個捲住咗嘅狀態,平時捲返做同一個樣就咁放落袋,慳位好多~


▲ 麻雀雖小,五臟俱全,解返開後大家會獲得一個食物袋同一條手抽帶

今日睇真啲Lasty啲細節

手抽安裝冇難度

附上嘅手抽帶方便使用者唔使額外再裝入另一個袋,喺街上面都可以隨時打開隨時拎走,安裝都好簡單~


▲ 先將U型嗰邊以LOGO朝內嘅方式,由下往上套入扣環,套入後翻轉180度,再將手抽帶拉到盡,再將U型倒轉,並以LOGO朝內的方式向下套入扣環,套入後再翻轉180度,就係一條好穩陣嘅手抽~
(或者包裝內會有QR code,scan後會有詳細說明,唔怕!)

一抽二掕都無有怕 Lasty單手操作模式

可以攤的話不會郁,可以用一隻手做到嘅嘢 又點解要用兩隻手呢?~


▲ 只要將食指同手指公放喺袋邊邊框,再輕輕一按,然後撳翻實個鎖扣,就可以鎖實個袋,單身搞掂成個步驟㗎喇~

防漏耐熱冷藏微波 十八般武藝 你係攞你命3000?


▲ Lasty食物袋用咗通過美規FDA、德國LFGB檢驗標準嘅白金級矽膠原料,具備功能之餘又可以輕鬆收納。


▲ 白金級矽膠有咩咁巴閉,就係佢可以冷凍雪藏、可以微波加熱,連放落洗碗機同烘碗機都冇問題
*溫馨小提示:初次使用前最好用啲中性嘅洗潔精洗吓先


▲ 喺打開咗嘅狀態會見到內側有條線,佢係液體嘅容量警界線,液體承載超過呢條線就會有漏汁嘅風險㗎啦
*官方指液態容量係750ML


▲ 只要唔超過警界線同唔好大力擠壓佢,小編實測過真係可以做到防漏,所以外賣固體液體粥粉麵飯都可以~


▲ 擁有無膠條專利設計,較同類產品更易清潔,減少卡垢發霉。官方測試指食物袋可以耐重至少約2KG,但都要小心唔好裝太重!

戰鬥進化戰鬥再進化:Lasty一二代有咩分別

Lasty吸收咗第一代嘅意見反饋後,改良再開發咗第二代食物包!


▲ (左邊為第二代,右邊為第一代)
最大分別相信係呢條手抽帶,第一代嘅手抽帶採用同本體一樣嘅矽膠,而第二代搖身一變 變成硬身啲嘅LDPE手提膠帶


▲ 第一代嘅軟身矽膠帶會帶嚟一個都幾麻煩嘅問題,當食物袋裝咗嘢食嘅時候,因為膠帶嘅支撐力無咁大,所以好容易令食物袋傾斜。
一來拎起上嚟左搖右擺咁 難拎又唔美觀,二來都增加咗倒瀉嘢嘅風險。


▲ 而第二代嘅手提帶硬啲,相對挺身好多,就大大減少咗呢個問題嘅發生。


▲ 實測咗第二代喺裝咗液體之後,左揈右揈後最多都只會係呢個斜度,傾斜度大大減低


▲ 加上第二代配件將本來較易磨損嘅PP材質 升級為耐用嘅高剛性ABS,所以無咁容易壓壞同刮花~

痴線蜘蛛條蜘蛛絲痴住支樹枝 有得必有suck


▲ Lasty 袋身以矽膠製造,雖然好處係使用彈性易收納,但都有個明顯嘅缺點,就係外層袋身勁易痴到塵、頭髮之類嘅微型污糟物
喺我哋影產品圖嘅時候,個袋底已經喺唔知幾時痴咗啲微塵毛髮線頭……


▲ 小編喺屋企實測食物袋嘅承載液體能力,已經有乖乖地咁冇超過條安全線,但左右摺起嘅位置喺扣起後會累積咗液體,
打開時就會由開口位嘅兩邊流返出嚟, 屋企都睇到小瀑布……但呢個應該係無可避免的(;ω; )
所以都建議大家裝完有湯嘢食 喺準備開餐打開前,先墊塊布或者鋪好枱。

不過瑕不掩瑜,唯有裝液體打開時小心啲,清洗嘅時候順便洗埋外層,小編個人使用時覺得都可接受嘅~

我和Lasty有個約會

其實小編都幾經常會帶輕便早餐返工食,但喺麵包鋪買簡單一個包都要用到一個膠袋,
每日咁用法 覺得自己都幾大晒鬼,所以自己喺接觸Lasty之前 已經開始產生咗想入手一個食物袋/食物盒嘅諗法,
咁適逢要實測埋σ`∀´)σ 就一於帶住Lasty,試下係咪真係一款無論對用家定店家都friendly 嘅環保容器!


▲ 一個good morning由一個肥仔麵包開始,
如常地入包鋪,今次直接打開個Lasty,放個包入去,
收銀處靚姐輕輕一睄 見到係蔥腿包,可能見慣大風大浪嘅佢如常地收咗$7.5,
如常地離開拎住返公司,一切如常,但慳咗個膠袋,像極了愛情。


▲ 乾爽嘅蔥腿包,食完之後輕輕沖一沖洗就ok~


▲ Lunch去咗一間泰國菜買外賣,好順利地買到同拎返上office


▲ 靚靚金邊粉!而且一啲都冇影響份量,照樣食到飽一飽


▲ 拎到返嚟覺得凍咗少少,成個放入微波爐叮一叮,相當方便~


▲ 但因為打開後袋身比較高,今餐本身用筷子就冇問題,但如果有時要用短柄啲嘅叉或羹 就應該會比較難喺袋內撈食物


▲ 第二個早上喺屋企帶兩片方包,但朝早起身唔想拎住,放入背囊仔啱啱好帶返工~


▲ 第三日早餐食燒賣,容量大到裝十粒綽綽有餘,我諗裝四十粒都唔係問題


▲ 收工後帶返屋企,摺埋後只係後面本A5簿嘅一半,帶住行街都唔怕掗拃

誠實豆沙包 Lasty實際用後感

小編作為環保初哥,用咗幾日個人感受覺得都幾方便,同以往覺得環保就要麻煩啲嘅印象都有啲唔同。
裝乾身食品完全冇難度,而且比起傳統環保食物盒慳位,當飯袋都ok,有時自己淨係孭個細斜孭袋都可以解放雙手,兩手揈揈咁走~
但晚餐試過買鹽水雞等重口味嘢食,食完之後需要盡快洗,若果唔係可能會殘留氣味( ˘・з・)

雖然裝小食超級方便,大部分店家都相當歡迎食物包。但去買米線同薯粉等湯類食品時,都有店員表示基於安全同衛生守則,若果想用食物袋就需要自己裝返,相對就冇咁方便。
但都有聽聞有米線鋪頭係可以直接用到的,所以使用前都記得先問清楚 ε(*´・∀・`)з゙

Lasty官網
https://www.lasty.tw/

〖 現貨賣場Humbrand 〗台灣製造 Lasty 環保食物包
https://www.humbrand.com/products/台灣-lasty-環保食物包


環保呢樣嘢大家都覺得好遙遠,但原來一直都喺眼前。
就好似以前大家都習慣買嘢用膠袋,而家出街都開始自備帶多個購物袋。

好多嘢以往冇留意嘅 都可以由呢刻做起,大家都可以做多一步。