品牌推薦, 益您情報, 立雜奇趣

【開箱】My Little Box 2022年 9月號

有錢就身痕!
尤其而家円咁平,見到吸引嘅日本嘢就腦波弱忍唔住手了(๑´ڡ`๑)
除咗平時大家已經買慣買熟嘅zozotown同日本樂天之外,其實其他日本當地網站都可以透過我哋去代購㗎~
例如今日同大家介紹嘅呢款日本美妝盲盒 My Little Box

福袋定伏袋?我都唔知㗎(*ˇωˇ*人)

日本美妝盲盒 My Little Box 會係按月訂購同出貨的,每月訂閱價格¥3350。每個月會設定唔同主題,嚴選當季流行美妝同時尚配件、雜貨等,並以精美插畫包裹再寄畀訂購者嘅驚喜禮物盒。
佢哋已經有八年歷史,而且合作品牌都有一定嘅知名度,唔怕入面係普遍清貨福袋概念嘅雜牌產品 怕用壞人,亦大大減低咗買咗返去後唔實用 得個擺字嘅機會!
以往都有唔少youtuber開過箱,對呢種盲盒冇咩抵抗力嘅小編已經準備訂閱幾期,嚟緊幾個月都會為大家開箱,揭開廬山真面目(╯✧∇✧)╯

9月號 BISTROT DES DAMES

My Little Box 9月號以BISTROT DES DAMES為主題,意思係法文嘅「女士們嘅小餐館」,喺舒適嘅小餐館露台座位上girl’s talk 一齊迎接新嘅季節。
意境上好chill好舒服,今期帶畀我哋嘅會以滋潤類型嘅單品同日常小雜貨為主,先以一個簡約嘅A4 size紙盒包裝開始 ( *´◒`*)

打頭陣會有一本小冊子同幾張小單張,除咗會列出今期內容單品之外,仲會詳細介紹埋背後品牌同推薦用法,有時仲會有啲訪問同小遊戲或者心理測驗,用google translate嘅相機功能都唔難睇得明啲介紹 (๑•̀ㅂ•́)و✧另外啲單張仔嘅設計都幾靚,睇完之後小編會留嚟整手帳嘅背景,物盡其用!


單品中最大份最顯眼嘅係L’ORÉAL PARIS 嘅美髮油,含有94%以上保濕同保護成分,加入咗來自法國南部嘅薰衣草精油同以保濕作用著稱嘅甜橙精油,喺吹頭前或者乾髮時使用可以控制頭髮嘅水分平衡,滋養頭髮。味道係清新嘅花果香,又好聞又有光澤嘅秀髮 自己聞到摸到都心情好啲(๑•̀ω•́)ノ
而且係貨size 100mL,睇返香港同系列產品嘅售價會係$125,即刻覺得回本一半!

緊接會有 Minon AminoMoist 嘅產品!相信有留意日本藥妝嘅話對呢個牌子絕對唔陌生,品牌使用為敏感肌而設嘅低刺激性獨創配方,除咗加入輔助肌膚屏障功能嘅9種氨基酸外,仲含有呵護各種肌質常見煩惱嘅氨基酸,強化同保護肌膚並重。

一盒四片嘅保濕面膜可以話係品牌皇牌,佢嘅精華液係凝膠質地,貼服皮膚又唔會流到周圍都係,精華可滲透到角質層,加強肌膚屏障防禦機能。以前第一次去日本嘅手信攻略中佢都榜上有名,雖然事後發現香港都有賣,但確實啱晒換季臨近甩皮嘅肌膚~
仲有一套試用套裝,同樣適用於敏感同乾性皮膚,套裝包括保濕化妝水II (Moist-Type) 20ml、保濕乳液 20g、兩包 UV妝前隔離霜 0.5g,另外附送咗兩包酵素潔面粉。化妝水同乳液會係約10日份量,細細包staycation同旅行都可以用到 ٩(。・ω・。)و

嚟到My Little Box 自家出品,每次盲盒都會加入1 – 3件自家出品,多數以雜貨飾品為主。今次第一樣會係盒仔包裝嘅單隻耳骨夾,介紹話戴住佢嘅話 當你梳頭時畀人見到一瞥金色可以增強個人魅力 XD 有冇咁有魅力就見人見智啦,不過小編咁啱就係冇穿耳嘅人,覺得呢款其實比較簡單幾好襯,而且佢可以自行調整大細,唔怕夾得太耐會痛。



第二樣自家出品係 My Little Beauty 眼影筆,介紹指呢款鉛筆型眼影採用 99.4% 天然成分製成,含有荷荷巴油、橄欖油等保濕成分,容易啲上妝又對眼睛溫和。帶有閃粉嘅棕色無論係日常定夜晚出街都適用。小編第一次使用呢種眼影筆,筆型好似容易啲控制上妝範圍,但深淺就好似有啲難度 需要啲時間再試下(*゚ー゚) 同埋佢係大地色系 閃粉珠光都唔算好明顯,日常用應該都幾方便~



▲ 左至右分別係就咁打直畫線、好似素描咁打斜、輕手啲打斜後再捽開

第三樣自家出品會係超大型tote bag手提包同索繩收納袋仔,設計靈感來自巴黎小餐館常見嘅地磚圖案,柔和嘅豆綠色帶畀人一種秋天嘅印象。佢摺疊之後可以收納喺索繩袋仔中,作為購物袋或者備用袋都相當實用。




▲ 設計師特登加大袋嘅尺寸,因為佢覺得如果袋中有足夠空間,可以營造出精緻嘅寬鬆感,打造現代感。雖然唔係太明白呢個理念,平時亦好少可會孭大約A3咁大個袋,但如果要用到大袋嘅時候 就可以有ikea大袋以外嘅選擇!

今期仲額外送咗一支NIVEA 潤唇膏,但喺公佈嘅單品名單入面冇嘅,同埋後面會特別備註咗贈品,可能係見我dry特登送畀我இдஇ


雖然價格上應該係回本嘅,但始終唔係自己揀嘅產品,未必樣樣都一定啱心水(ㆆᴗㆆ)
呢類型嘅盲盒實用不足,但浪漫有餘,每個月作為小小嘅儀式感,當係送畀努力工作嘅自己嘅一份禮物,今個月你都辛苦了。

My Little Box 日本官網
https://www.mylittlebox.jp/

My Little Box 2022年9月號盲盒內容-官方發佈版
https://www.mylittlebox.jp/box/bistrot-des-dames

日本其他網站 | 人手報價
https://www.gtm.hk/shop/mxj/

Related Posts

One thought on “【開箱】My Little Box 2022年 9月號

  1. ...表示:

    開箱幾得意

Comments are closed.